手作營人 情迷香港製造

(文章來源:果籽)港產山野營人別具個性,有人追求簡約輕盈的哲學,嫌市面營具質素參差,索性動手製作,創立自家品牌;有人講究享受,開車帶上美輪美奐的重型裝備到營地,坐得舒適、瞓得招積,甚至把農場開拓成新營地,悠然自得,好與三五知己共聚。他們都有一個共通點:獨愛香港製造,尤其是手作的貼心與獨特。記者跟多位營人邂逅於全港首個主售本地露營品牌的戶外市集,談到手作心得,對方更傾囊相授自製營具小貼士,以及懶人露營熱點,本土營人必睇!

體驗,由此出發

中學就識車帳幕?!

「讀初中嗰陣就識車嘢,先係攞啲碎布嚟試,之後車咗一個單層嘅四人營。因為係防水布料,所以好重,啲線又車到斜晒。」本地露營品牌PiCharPaK WorkSHop.的主腦孔劍剛(Jason)當時年紀尚輕,已可親自製作出一個戶外的家,記者不禁由衷讚嘆。他又解釋那時「忽發奇想」的緣由,「想要一個A字營,結構太複雜,唔知喺邊度買,索性自己車一個。」原來這位車衣少男的家族經營帆船布生意,神技乃自小出入廠房跟工人偷師得來。閒時會否拿出舊物、重溫童年回憶?長大了的Jason耍手兼擰頭,「太重啦,個營都唔知去咗邊。」加上那時相機太貴,爸爸不准他帶上山,結果沒法留下倩影,實在有點遺憾。

除了幫父母打理業務,Jason平時也愛自製輕量露營裝備,四年前更成立品牌,產品以背囊及小袋為主,事事追求精緻,做到最好,「整一個背囊都唔簡單,揹帶、拉鏈、揀料、車嘅工序絕對唔可以馬虎,市面上嘅背囊,時間耐咗就容易入水。」因為工作關係,他認識了一間生產戶外物料的工廠,遂引入一種更耐用、更防水的布料來製作背囊。現時產品主要為輕量露營而設,更可訂做個人化背囊,自選索帶及袋身顏色,清一色又得,五顏六色都得。他又希望本地露營品牌可以越出越多,「其實唔難,只要買到布料,加上小型衣車就搞掂。」期待一班營友車出新景象。

煮食鍋袋$130
可裝載大小露營煲,顏色鮮艷。

16L防水背囊
左$616、右$714
適合行山及輕量露營,更可自行訂做,隨意配搭索帶顏色。

牛仔布營釘袋$100
外形精緻,亦可當作筆袋,一物多用。

40L大背囊
非賣品,Jason說經改良後才能出售。

肩帶不是車在背囊上,可以拆除,讓闊肩膊的人移動更靈活。

facebook:PiCharPaK WorkSHop.

 

美製太粗疏 自製先精緻

「行山嘅話,即日來回太趕啦,露營就可以hea吓,慢慢感受山入面嘅一切。」於2009年成立露營網站GO OUT的陳曉鐘(Tara),享受慢條斯理,從中追求完美。輕量露營除了要求裝備越輕越好,還有自製裝備(make your own gear),故在美國衍生出很多自家製品牌,Tara光顧後發現質素參差,「線位好鬆,啲線車到斜晒,布料九唔搭八。」但他補充:「可能自己要求高啫,功能上係可接受嘅。」於是他鑽研車衣技巧,自製露營用品,越車越上癮,由露營必備的天幕、營幕、斜揹袋,甚至羽絨睡袋……朋友紛紛相詢:「你啲gear賣唔賣?」聽得太多,兩年前索性創立品牌Tara Poky Works。

創業難,守業更難,Tara既要兼顧平面設計師的正職,又要善用公餘時間日車夜車,「自己用嘅嘢,會用較短時間嚟完成,賣畀人嘅嘢,責任重大,工藝上必定會改良,要追求完美。」現時他主要出售天幕及小袋等用品,不論露營或逛街,奪目顏色定必讓營仔營女搶盡風頭。至於自家製睡袋或營帳則尚未推出,「棉同羽絨佔嘅空間好大,好難壓縮嚟收納,而營帳面積好大,好難剪布。」開發一個品牌,也得緊貼潮流不斷進步,Tara會到各地取經,最近就到青島參觀當地戶外品牌「自由之魂」的工廠,吸收對方的發展經驗,他又堅持用心製作、用心感受,相信有朝一日會有口皆碑。

Tara用來製作露營用品的布料十分輕盈,可帶到戶外剪裁。

中型側揹袋$350
用上防水物料Spinnaker製造,甚為挺身,有十多種顏色可供配搭。

小型側揹袋$240
透明設計方便找出小物,不用左翻右翻。

銀色天幕$960
兩面使用,藍黑一面可吸熱,銀色一面則可反射熱力。

小型背囊$480
使用X-Pac防水物料製作,能抵受風吹雨打。

facebook:Tara Poky Works

 

野外耍「皮」氣

自六年前學會製作皮具後,羅寶文(Leslie)最近更把版圖延伸至露營界,並豪氣地說:「仲未有人用皮嚟做露營產品,咪試吓囉。」原意是想裝備與眾不同,卻漸漸領悟簡約的藝術,「香港人使好多錢嚟買露營裝備,好容易貪新忘舊,好浪費。」朝九晚六在辦公室拼搏,下班後Leslie便變身手作人,畫紙樣、剪皮、染色、打孔及縫補等程序一手包辦,她希望付出的心血,能令知音人更懂惜物。

皮杯套、點綴營帳的三角小旗、縫有圖案的萬用皮墊等,全都美觀實用。不慎打翻剛煮好的湯也毋須擔心,因為萬用皮墊具有防水塗層。留下污漬?Leslie認為這是一種經歷,應跟它和諧共處,記得定時塗油保養,隨歲月流逝,它會成為你行山露營的忠實良伴。

Leslie愛於野外縫製皮革,寧靜的環境令她特別專注。

萬用皮墊$250
可以當作煲墊,Leslie還噴了防水塗層,不怕弄濕。

皮杯套$200
設有皮繩調校鬆緊,十分貼心。

迷彩三角小旗$120

facebook:PlayHard Outdoor

 

覓地推行汽車露營 聚眾大搞戶外市集

謙稱露營新手的David,2013年首次跟朋友到上水馬草壟玩汽車露營(car camping),從此被深深吸引,「我同老婆都鍾意煮飯仔、佈置營帳環境,仲鍾意坐得舒服,寧願帶張大木凳去坐。而且會call van仔,唔使孭住重到死嘅裝備通山走。」他又說,在大自然跟知己甚至陌生人聊天也會特別暢快,「出去食飯,好多餐廳都要限時,唔可以暢所欲言,露營就傾幾耐都得。」

他曾到台中老官道休閒農場汽車露營,令他眼界大開,並希望把這種休閒的露營文化在香港發揚光大。由於香港提供汽車露營的地方不多,於是他積極尋找本地農場合作,去年找到元朗錦田大江埔村的活機園有機農場,於每年9月至翌年4月舉辦露營活動。本月月中,他還結合一眾本地露營品牌結合,包括

PiCharPaK WorkSHop.、Tara Poky Works、PlayHard Outdoor及售賣備長炭燒烤爐的「野炊士多」等,於農場舉辦了全港首個主打本土露營品牌的戶外市集「港造營」。活動自去年10月籌備,本以為當日會下雨,最後天公造美,更有700多人前來,反映了本地戶外品牌的需求及優勢。David表示將再辦類似活動推廣本地品牌,但形式或會加點新意。詳情?他則賣個關子,喜歡Made In Hong Kong的粉絲要留意了。

David自2013年愛上露營,風格以休閒為主,喜歡花心思佈置營帳,享受舒適的戶外設備。

香港天氣悶熱,David把Bell Tent營幕稍加修改,底端改為紗網,並交給廠商生產成高3米的特別版Bell Tent,營身為棉質,重達16公斤。$4,300

於1月17日舉行的戶外市集「港造營」,標榜香港製造,入場人數達700多人。
圖片由受訪者提供

 

客人心聲

山藝教練陳漢棠:「呢啲品牌嘅製作較有心機,有少少瑕疵都會全部改過;背囊物料又輕又韌,好適合行山。」

營友Traci:「估唔到香港人咁鍾意露營,我買咗個備長炭燒烤爐,好得意。」

facebook:Camperism友營人俱樂部

 

露營懶人無憂之選

難得周末想去露營,但又不想背着沉重裝備?便要選個交通方便,更有淋浴設備的懶人營地!David就有三個心水推介畀大家。

 

1.親親動物之選:元朗大江埔村活機園有機農場

特色:漁農自然護理署指定營地的浴室只提供凍水,但這裏則提供熱水;可把汽車泊於農場村口;更可到農場看看山羊及小豬
交通:自行駕車至大江埔酒房門口,或在元朗港鐵站乘602號小巴於大江埔酒房下車,然後步行約5分鐘
營位:10至15個4人營
收費:每年9月至翌年4月期間,每月舉辦一次露營活動,兩日一夜,成人每位$130,小童半價

facebook:活機園CASA LOHAS

2.免費之選:粉嶺鶴藪營地

特色:屬漁護署指定營地,設施齊全,包括燒烤爐、晾衫架、浴室及涼亭等;鄰近鶴藪及南涌等郊遊徑
交通:在粉嶺港鐵站乘坐52B號專線小巴,於鶴藪村總站下車。向鶴藪水塘步行約15分鐘
收費:免費
營位:40個

3.動靜皆宜之選:上水東華三院馬草壟營地

特色:設有沖水廁所及凍水浴室,有4人營幕、地蓆、燒烤爐等可供租借,更可享用定點射擊、繩網挑戰等高難度設施
交通:駕車前往,或於上水港鐵站乘坐51K專線小巴到馬草壟,車程約15分鐘
收費:泊車費$160,成人每位$120,6歲以下兒童免費
注意事項:必須於入營當日的三星期前遞交申請表,如場地總人數不足30人(不包括6歲以下兒童),便會取消該營期或安排其他營期
查詢:http://youthcamp.tungwahcsd.org

原文 Link http://hk.apple.nextmedia.com/supplement/travel/art/20160129/19470295 

撰文: 梁慧琳 

圖片: 鄧鴻欣  劉永發  林栢鈞 

延伸閱讀